വിക്രം ജൂലൈ 8 മുതൽ ഹോട്ട്സ്റ്റാറിൽ
|
|
Written By
|
News
തിയേറ്ററുകളില്‍ വിജയകരമായി പ്രദര്‍ശനം തുടരുന്ന ഉലക നായകന്‍ കമല്‍ ഹാസന്റെ ഏറ്റവും പുതിയ ചിത്രമായ 'വിക്രം' ഒടിടിയിലേയ്ക്ക്. ജൂലൈ 8ന് ചിത്രം ഒടിടിയില്‍ റിലീസ് ചെയ്യും. ഡിസ്‌നി പ്ലസ് ഹോട്ട്സ്റ്റാറിലൂടെയാണ് ചിത്രം പ്രേക്ഷകർക്ക് മുൻപിലെത്തുന്നത്.
വിക്രമിന്റെ ഡിജിറ്റല്‍ അവകാശങ്ങള്‍ ഡിസ്‌നി പ്ലസ് ഹോട്ട്സ്റ്റാര്‍ നേടിയിരുന്നു. 100 കോടി രൂപയ്ക്കാണ് ഹോട്ട്സ്റ്റാര്‍ ചിത്രത്തിന്റെ ഡിജിറ്റല്‍ അവകാശങ്ങള്‍ സ്വന്തമാക്കിയത്.
10 വര്‍ഷത്തിന് ശേഷം കമല്‍ ഹാസന്‍ വെള്ളിത്തിരയിലേയ്ക്ക് മടങ്ങിയെത്തിയ ചിത്രമാണ് വിക്രം. ആരാധകര്‍ ഇരുകയ്യും നീട്ടി സ്വീകരിച്ച ചിത്രം അടുത്തിടെ 300 കോടി ക്ലബ്ബില്‍ ഇടംനേടിയിരുന്നു. ഇതിനോടകം തന്നെ ബോക്‌സ് ഓഫീസില്‍ നിരവധി റെക്കോര്‍ഡുകള്‍ വിക്രം സ്വന്തമാക്കി കഴിഞ്ഞു. തമിഴ്‌നാട്ടില്‍ ഏറ്റവും കൂടുതല്‍ കളക്ഷന്‍ നേടുന്ന ചിത്രം എന്ന റെക്കോര്‍ഡ് വിക്രം അടുത്തിടെ സ്വന്തമാക്കിയിരുന്നു.
കേരളത്തിലും വിക്രമിന് മികച്ച പ്രതികരണമാണ് ലഭിച്ചത്. കേരളത്തില്‍ റിലീസ് ചെയ്യുന്ന എക്കാലത്തെയും വലിയ തമിഴ് ഹിറ്റായി വിക്രം മാറുകയും ചെയ്തു. മലയാളി താരങ്ങളായ ഫഹദ് ഫാസില്‍, നരേന്‍, ചെമ്പന്‍ വിനോദ് എന്നിവര്‍ ചിത്രത്തിലെ പ്രധാന വേഷങ്ങള്‍ കൈകാര്യം ചെയ്യുന്നുണ്ട്. വിജയ് സേതുപതിയാണ് വിക്രമിലെ മറ്റൊരു പ്രധാന കഥാപാത്രം കൈകാര്യം ചെയ്യുന്നത്. അതിഥി വേഷത്തില്‍ സൂര്യയും എത്തുന്നു.
ലോകേഷിന്റെ രണ്ടാമത്തെ ചിത്രം 'കൈതി'യുടെ ഭാഗമാണ് വിക്രം. സിനിമയുടെ റിലീസിന് മണിക്കൂറുകള്‍ക്ക് മുമ്പ് ലോകേഷ് കനകരാജ് ഇത് ഔദ്യോഗികമായി പ്രഖ്യാപിക്കുകയും ചെയ്തിരുന്നു. തന്റെ ആരാധനാതാരത്തെ നായകനാക്കി ലോകേഷ് ഒരുക്കിയിരിക്കുന്ന ആക്ഷന്‍ പാക്ക്ഡ് എന്റര്‍ടെയിനറാണ് വിക്രം എന്ന് പറയാം.
Related Stories
See All
Latest Update
