ചരിത്രം കുറിച്ച് വിക്രം: 400 കോടി ക്ലബ്ബിലേയ്ക്ക് അടുക്കുന്നു
|
|
Written By
|
News
ഉലക നായകന്‍ കമല്‍ ഹാസന്റെ 'വിക്രം' ബോക്സ് ഓഫീസിലെ കളക്ഷന്‍ റെക്കോര്‍ഡുകള്‍ തിരുത്തിക്കുറിക്കുകയാണ്. അടുത്തിടെ 300 കോടി ക്ലബ്ബില്‍ കയറിയ ചിത്രം ഇപ്പോള്‍ ഇതാ 400 കോടി ക്ലബ്ബിലേയ്ക്ക് അടുക്കുകയാണെന്നാണ് റിപ്പോര്‍ട്ട്. ഒരു ഇടവേളയ്ക്ക് ശേഷം വെള്ളിത്തിരയിലേയ്ക്കുള്ള ഉലക നായകന്റെ മടങ്ങിവരവ് ആഘോഷമാക്കുകയാണ് കമല്‍ ഹാസന്‍ ആരാധകര്‍.
ഇതിനോടകം തന്നെ ബോക്സ് ഓഫീസില്‍ നിരവധി റെക്കോര്‍ഡുകള്‍ വിക്രം സ്വന്തമാക്കി കഴിഞ്ഞു. ഇതുവരെയുള്ള കണക്കുകള്‍ പ്രകാരം റിലീസ് ചെയ്ത് വെറും 20 ദിവസത്തിനുള്ളില്‍ 390.50 കോടി രൂപയാണ് വിക്രം നേടിയിരിക്കുന്നത്. 2.0 കഴിഞ്ഞാല്‍ ഏറ്റവും കൂടുതല്‍ കളക്ഷന്‍ നേടുന്ന തമിഴ് ചിത്രമായി വിക്രം മാറിക്കഴിഞ്ഞു.
കേരളത്തിലും വിക്രമിന് മികച്ച പ്രതികരണമാണ് ലഭിച്ചത്. കേരളത്തില്‍ റിലീസ് ചെയ്യുന്ന എക്കാലത്തെയും വലിയ തമിഴ് ഹിറ്റായി വിക്രം മാറുകയും ചെയ്തു. കേരളത്തില്‍ നിന്ന് മാത്രം ഏകദേശം 75 കോടിയിലധികം ചിത്രം നേടിക്കഴിഞ്ഞു.
മലയാളി താരങ്ങളായ ഫഹദ് ഫാസില്‍, നരേന്‍, ചെമ്പന്‍ വിനോദ് എന്നിവര്‍ ചിത്രത്തിലെ പ്രധാന വേഷങ്ങള്‍ കൈകാര്യം ചെയ്യുന്നുണ്ട്. വിജയ് സേതുപതിയാണ് വിക്രമിലെ മറ്റൊരു പ്രധാന കഥാപാത്രം കൈകാര്യം ചെയ്യുന്നത്. അതിഥി വേഷത്തില്‍ സൂര്യയും എത്തുന്നു.
ലോകേഷിന്റെ രണ്ടാമത്തെ ചിത്രം 'കൈതി'യുടെ ഭാഗമാണ് വിക്രം. സിനിമയുടെ റിലീസിന് മണിക്കൂറുകള്‍ക്ക് മുമ്പ് ലോകേഷ് കനകരാജ് ഇത് ഔദ്യോഗികമായി പ്രഖ്യാപിക്കുകയും ചെയ്തിരുന്നു. തന്റെ ആരാധനാതാരത്തെ നായകനാക്കി ലോകേഷ് ഒരുക്കിയിരിക്കുന്ന ആക്ഷന്‍ പാക്ക്ഡ് എന്റര്‍ടെയിനറാണ് വിക്രം എന്ന് പറയാം.
തിയേറ്ററുകളില്‍ വിജയകരമായി പ്രദര്‍ശനം തുടരുന്ന 'വിക്രം' വൈകാതെ തന്നെ ഒടിടിയിലും റിലീസ് ചെയ്യുമെന്നാണ് റിപ്പോര്‍ട്ട്. ജൂലൈ 8ന് ചിത്രം ഒടിടിയില്‍ റിലീസ് ചെയ്യുമെന്ന വിവരമാണ് പുറത്തുവരുന്നത്. വിക്രമിന്റെ ഡിജിറ്റല്‍ അവകാശങ്ങള്‍ ഡിസ്നി പ്ലസ് ഹോട്ട്സ്റ്റാര്‍ നേടിയിരുന്നു. 100 കോടി രൂപയ്ക്കാണ് ഹോട്ട്സ്റ്റാര്‍ ചിത്രത്തിന്റെ ഡിജിറ്റല്‍ അവകാശങ്ങള്‍ സ്വന്തമാക്കിയത്.
Related Stories
See All
Latest Update
