News

മോഹന്‍ലാല്‍ ആരാധകര്‍ക്ക് പ്രതീക്ഷയും ആവേശവും നല്‍കുന്ന റിപ്പോര്‍ട്ടാണ് പുറത്തുവരുന്നത്. റാം രണ്ട് ഭാഗങ്ങളിലായാണ് റിലീസിനെത്തുകയെന്നാണ് സൂചന. റാം 1, റാം 2 എന്നിങ്ങനെ രണ്ടു ഭാഗങ്ങള്‍ ആയി വലിയ ക്യാന്‍വാസിലാണ് ചിത്രം ഒരുങ്ങുന്നത്. തൃഷയാണ് ചിത്രത്തില്‍ മോഹന്‍ലാലിന്റെ നായികയായി എത്തുന്നത്. 

യുകെയിലും യൂറോപ്പിലുമായാണ് രണ്ട് ഭാഗത്തിന്റെയും ബാക്കി ഭാഗങ്ങള്‍ ഷൂട്ട് ചെയ്യുക. ഇതോടെ റാം ഒരു ബിഗ് ബജറ്റ് ചിത്രമാണെന്ന കാര്യം ഉറപ്പായിരിക്കുകയാണ്. വെറും ബിഗ് ബജറ്റ് മാത്രമല്ല, ബ്രഹ്‌മാണ്ഡ ചിത്രം തന്നെയാണ് റാം എന്ന പ്രതീക്ഷയിലാണ് ആരാധകര്‍. ജീത്തു ജോസഫിന്റെ കരിയറിലെ തന്നെ ഏറ്റവും ഉയര്‍ന്ന ബജറ്റിലാണ് റാം ഒരുങ്ങുന്നത്. 

പ്രമുഖ ട്രേഡ് അനലിസ്റ്റായ ശ്രീധര്‍ പിള്ളയുടെ ട്വീറ്റാണ് ചിത്രവുമായി ബന്ധപ്പെട്ട ചര്‍ച്ചകള്‍ക്ക് ചൂട് പിടിപ്പിച്ചത്. ഒന്നിലധികം ഭാഷകളിലേക്ക് മൊഴിമാറ്റം ചെയ്യപ്പെടുന്നതിനാല്‍ ഒരു വലിയ പാന്‍ ഇന്ത്യ താരത്തെ ഉള്‍പ്പെടുത്തി യൂറോപ്പിലും യുകെയിലും കൂടുതല്‍ ഷൂട്ടിംഗ് ഉടന്‍ പുനരാരംഭിക്കും എന്നായിരുന്നു ശ്രീധര്‍ പിള്ളയുടെ ട്വീറ്റ്. 

അഭിഷേക് ഫിലിംസിന്റെ ബാനറില്‍ രമേഷ് പിള്ള, സുധന്‍ എസ് പിള്ള എന്നിവരാണ് നിര്‍മ്മാണം. ആശിര്‍വാദ് സിനിമാസും മാക്‌സ് ലാബുമാണ് റിലീസ്. ഇന്ദ്രജിത്ത്, സിദ്ദീഖ്, ലിയോണാ ലിഷോയ്, ഇര്‍ഷാദ് എന്നിവരും ചിത്രത്തിലുണ്ട്.