റിലീസ് ചെയ്ത സ്ഥലങ്ങളിലെല്ലാം മികച്ച പ്രതികരണങ്ങള്‍ നേടിയാണ് വിക്രം കുതിക്കുന്നത്. ഇതിനിടെ നിര്‍ണായകമായ ഒരു നാഴികക്കല്ലും വിക്രം മറികടന്നിരുന്നു. റിലീസ് ചെയ്ത് 10-ാം ദിവസം വിക്രം 300 കോടി ക്ലബ്ബില്‍ ഇടംപിടിച്ചിരിന്നു. 2019ന് ശേഷം ആദ്യമായാണ് ഒരു തമിഴ് ചിത്രം 300 കോടി ക്ലബ്ബില്‍ ഇടംനേടുന്നത്. 

തമിഴ്‌നാട്ടില്‍ നിന്ന് മാത്രം ചിത്രം 140 കോടി രൂപയാണ് വാരിയതെന്ന് ട്രേഡ് അനലിസ്റ്റ് എല്‍എം കൗശിക് ട്വിറ്ററില്‍ കുറിച്ചു. രാജ്യത്തുടനീളമുള്ള തീയറ്ററുകളിലും രാജ്യാന്തര സര്‍ക്യൂട്ടിലും ചിത്രം മികച്ച പ്രകടനം കാഴ്ചവെക്കുന്നതായി ട്രേഡ് അനലിസ്റ്റായ മനോബാല വിജയബാലന്‍ അറിയിച്ചു. ഇപ്പോഴും പ്രേക്ഷകരുടെ എണ്ണത്തില്‍ കുറവുണ്ടാകാത്തതിനാല്‍ വിക്രം കൂടുതല്‍ ഉയരങ്ങള്‍ കീഴടക്കുമെന്നാണ് കരുതപ്പെടുന്നത്.

ഇതിനിടെ കേരളത്തിലും വിക്രമിന് മികച്ച പ്രതികരണമാണ് ലഭിച്ചത്. കേരളത്തില്‍ റിലീസ് ചെയ്യുന്ന എക്കാലത്തെയും വലിയ തമിഴ് ഹിറ്റായി വിക്രം മാറുകയും ചെയ്തു. മലയാളി താരങ്ങളായ ഫഹദ് ഫാസില്‍, നരേന്‍, ചെമ്പന്‍ വിനോദ് എന്നിവര്‍ ചിത്രത്തിലെ പ്രധാന വേഷങ്ങള്‍ കൈകാര്യം ചെയ്യുന്നുണ്ട്. വിജയ് സേതുപതിയാണ് വിക്രമിലെ മറ്റൊരു പ്രധാന കഥാപാത്രം കൈകാര്യം ചെയ്യുന്നത്. അതിഥി വേഷത്തില്‍ സൂര്യയും എത്തുന്നു. 

ലോകേഷിന്റെ രണ്ടാമത്തെ ചിത്രം 'കൈതി'യുടെ ഭാഗമാണ് വിക്രം. സിനിമയുടെ റിലീസിന് മണിക്കൂറുകള്‍ക്ക് മുമ്പ് ലോകേഷ് കനകരാജ് ഇത് ഔദ്യോഗികമായി പ്രഖ്യാപിക്കുകയും ചെയ്തിരുന്നു. തന്റെ ആരാധനാതാരത്തെ നായകനാക്കി ലോകേഷ് ഒരുക്കിയിരിക്കുന്ന ആക്ഷന്‍ പാക്ക്ഡ് എന്റര്‍ടെയിനറാണ് വിക്രം എന്ന് പറയാം. 

റിലീസ് ചെയ്ത് ഒരാഴ്ച തികയുന്നതിന് മുന്‍പ് 225 കോടിയാണ് ചിത്രം നേടിയത്. രാജ്കമല്‍ ഫിലിംസിന്റെ ബാനറില്‍ കമല്‍ ഹാസനും ആര്‍. മഹേന്ദ്രനുമാണ് ചിത്രം ഒരുക്കിയത്. റിലീസിന് മുന്‍പ് തന്നെ ചിത്രത്തിന്റെ ഒടിടി സാറ്റലൈറ്റ് അവകാശങ്ങള്‍ 200 കോടി രൂപയ്ക്ക് വിറ്റുപോയിരുന്നു.