News

ഡ്രോണുകള്‍ ഉപയോഗിച്ച് സിനിമയുടെ പേരും പൃഥ്വിരാജിന്റെ രേഖാ ചിത്രവുമൊക്കെ ആകാശത്ത് തെളിയിക്കുകയായിരുന്നു. ഇതാദ്യമായാണ് ഒരു ഇന്ത്യന്‍ സിനിമയുടെ പ്രൊമോഷന്‍ ഈ രീതിയില്‍ നടത്തുന്നത്. സിനിമയുടെ പേരും രൂപവും തെളിഞ്ഞതിനേക്കാള്‍ ഉപരിയായി മലയാളം അക്ഷരങ്ങള്‍ തെളിഞ്ഞതില്‍ അഭിമാനിക്കുന്നുവെന്ന് പൃഥ്വിരാജ് പ്രതികരിച്ചു. ഡ്രോണ്‍ പ്രദര്‍ശനത്തിന്റെ വീഡിയോ പൃഥ്വിരാജ് ഫേസ്ബുക്കില്‍ പങ്കുവെച്ചിരുന്നു. 

ആക്ഷന് പ്രാധാന്യം നല്‍കുന്ന ചിത്രമാണ് കടുവയെന്ന് ടീസറും ട്രെയിലറുമെല്ലാം വ്യക്തമാക്കി കഴിഞ്ഞു. കട്ടക്കലിപ്പിലുള്ള കടുവാക്കുന്നേല്‍ കുറുവച്ചന്റെ മീശപിരിക്കലും ആക്ഷന്‍ രംഗങ്ങളുമായെത്തുന്ന ചിത്രം പാന്‍ ഇന്ത്യ റിലീസാണ് ലക്ഷ്യമിടുന്നത്. 'കടുവ' അഞ്ച് ഭാഷകളില്‍ പ്രദര്‍ശനത്തിന് എത്തും. മലയാളത്തിനു പുറമേ തമിഴ്, കന്നഡ, തെലുങ്ക്, ഹിന്ദി ഭാഷകളിലാണ് ചിത്രം പുറത്തിറങ്ങുക.

കടുവാക്കുന്നേല്‍ കുറുവച്ചന്‍ എന്ന പ്ലാന്ററുടെ റോളിലാണ് പൃഥ്വിരാജ് ചിത്രത്തിലെത്തുന്നത്. കടുവ'യില്‍ വില്ലനായി വിവേക് ഒബ്റോയും എത്തുന്നുണ്ട്. ജയിംസ് ഏലിയാസ് മാഞ്ഞിലേടത്ത് എന്ന ഐപിഎസ് ഉദ്യോഗസ്ഥനായാണ് കടുവയില്‍ വിവേക് എത്തുന്നത്. പൃഥ്വിരാജ് സംവിധാനം ചെയ്ത ലൂസിഫറിലും വിവേക് വില്ലന്‍ കഥാപാത്രമായി എത്തിയിരുന്നു.