News

ഇപ്പോള്‍ ഇതാ ജനഗണമനയുടെ രണ്ടാം ഭാഗത്തെ കുറിച്ച് വെളിപ്പെടുത്തിയിരിക്കുകയാണ് തിരക്കഥാകൃത്ത് ഷാരിസ് മുഹമ്മദ്. കുറച്ചുകൂടി വലിയ ക്യാന്‍വാസിലായിരിക്കും രണ്ടാം ഭാഗം പുറത്തിറങ്ങുക. ഒന്നാം ഭാഗമായി അത്ര സാമ്യമുണ്ടാകില്ല. ഒരു സ്‌റ്റോറി ലൈന്‍ പറഞ്ഞിട്ടുണ്ട്. അത് ഇനിയും പൂര്‍ണമാക്കാനുണ്ടെന്ന് അദ്ദേഹം പറഞ്ഞു. രണ്ടാം ഭാഗം പൃഥ്വിരാജ് അവതരിപ്പിച്ച അരവിന്ദ് സ്വാമിനാഥന്‍ എന്ന കഥാപാത്രത്തിന് കൂടുതല്‍ പ്രധാന്യം നല്‍കുന്നതായിരിക്കുമെന്ന സൂചനയാണ് ഷാരിസ് നല്‍കുന്നത്. 

ഒന്നാം ഭാഗത്തെ അപേക്ഷിച്ച് കൂടുതല്‍ ഇമോഷണലായിരിക്കും രണ്ടാം ഭാഗമെന്ന് ഷാരിസ് പറഞ്ഞു. ഒന്നാം ഭാഗത്തില്‍ ഇല്ലാതിരുന്ന കുറേ ഫ്‌ളേവേഴ്‌സ് രണ്ടാം ഭാഗത്തിലുണ്ടാകും. രണ്ടാം ഭാഗത്തിലെ വില്ലന്‍ അതിശക്തനായിരിക്കുമെന്നും അദ്ദേഹം വ്യക്തമാക്കി. രാജ്യത്തെ ആനുകാലിക, രാഷ്ട്രീയ, സാമൂഹിക സാഹചര്യങ്ങളെ വ്യത്യസ്തമായ രീതിയില്‍ അവതരിപ്പിച്ച ജനഗണമനയ്ക്ക് വലിയ സ്വീകാര്യത ലഭിച്ചിരുന്നു. ഏപ്രില്‍ 28നാണ് ചിത്രം തിയേറ്ററുകളില്‍ റിലീസ് ചെയ്തത്. തുടര്‍ന്ന് ജൂണ്‍ 2നാണ് നെറ്റ്ഫ്ളിക്സില്‍ സ്ട്രീമിംഗ് ആരംഭിച്ചത്. 

ബെംഗളൂരില്‍ ഒരു കോളജിലെ അധ്യാപിക ക്രൂരമായി കൊല്ലപ്പെടുന്നതും തുടര്‍ന്ന് കോളജില്‍ ഉണ്ടാകുന്ന പ്രക്ഷോഭങ്ങളിലൂടെയുമാണ് ജനഗണമനയുടെ തുടക്കം. ബലാല്‍സംഗം ചെയ്യപ്പെട്ട് തീകൊളുത്തി കൊല്ലപ്പെട്ട തങ്ങളുടെ അധ്യാപികയുടെ മരണത്തിന് കാരണക്കാരായവരെ നിയമത്തിനു മുന്നില്‍ കൊണ്ടുവരാന്‍ വിദ്യാര്‍ത്ഥികള്‍ സമരത്തിനിറങ്ങുന്നതും തുടര്‍ന്നുണ്ടാവുന്ന സംഭവങ്ങളിലൂടെയുമാണ് ജനഗണമനയുടെ കഥ മുന്നോട്ട് പോവുന്നത്. 

ഹൈദരാബാദില്‍ വെറ്ററിനറി ഡോക്ടറെ ക്രൂരമായി ബലാത്സംഗം ചെയ്ത ശേഷം കത്തിച്ച് കൊലപ്പെടുത്തിയ സംഭവത്തെ ഇത് ഓര്‍മ്മപ്പെടുത്തുന്നു. കേസിലെ പ്രതികളായ നാലുപേരും അന്ന് പോലീസ് ഏറ്റുമുട്ടലില്‍ കൊല്ലപ്പെട്ട സംഭവം രാജ്യത്ത് കോളിളക്കം സൃഷ്ടിച്ചിരുന്നു. പൃഥ്വിരാജ് പ്രൊഡക്ഷന്‍സിന്റെ ബാനറില്‍ സുപ്രിയ മേനോനും മാജിക് ഫ്രെയിംസിന്റെ ബാനറില്‍ ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിച്ചത്.