News

ദുബായ് : ലോക പരിസ്ഥിതി ദിനാചരണത്തിന്റെ ഭാഗമായി തരിശുഭൂമിയെ ഹരിതാഭമാക്കാൻ വേറിട്ടൊരു കൂട്ടായ്മ. യൂണിവേഴ്സിറ്റി ഓഫ് ഷാർജ , ഗൾഫ് മെഡിക്കൽ യൂണിവേഴ്സിറ്റി (GMU) എന്നിവിടങ്ങളിലെ അധ്യാപകരും ജീവനക്കാരും ചേർന്നാണ് തങ്ങളുടെ വീടിനോട് ചേർന്നുള്ള പ്രദേശം വൃത്തിയാക്കി കൃഷിയിടമാക്കിയത്.

​യൂണിവേഴ്സിറ്റി ഓഫ് ഷാർജയിലെ പ്രൊഫസറായ ഡോ. അനു രണഡെയുടെ വില്ലയ്ക്ക് പിന്നിൽ കല്ലും മണ്ണും മാലിന്യങ്ങളും നിറഞ്ഞുകിടന്നിരുന്ന തരിശുഭൂമിയാണ് ഇവരുടെ കഠിനാധ്വാനത്തിലൂടെ വിളവെടുപ്പിന് പാകമായത്.

                 പരിസ്ഥിതി സംരക്ഷണത്തോടൊപ്പം ഭക്ഷ്യസ്വയംപര്യാപ്തതയും ലക്ഷ്യമിട്ടായിരുന്നു ഈ സംരംഭം. മരച്ചീനി (കപ്പ), മധുരക്കിഴങ്ങ്, മുരിങ്ങ തുടങ്ങിയ വിവിധയിനം വിളകളാണ് ഇവർ ഇവിടെ വിജയകരമായി കൃഷി ചെയ്ത് വിളവെടുത്തത്.

​പരിസ്ഥിതി ദിനത്തിൽ പ്രകൃതിയെ സംരക്ഷിക്കേണ്ടത് കേവലം ചടങ്ങുകളിൽ ഒതുക്കാതെ, പ്രായോഗികമായി നടപ്പിലാക്കി സമൂഹത്തിന് മാതൃകയാവുകയാണ് ഈ കൂട്ടായ്മ. പ്രൊഫ. ഡോ. അനു രണഡെ, മിസ്സ്. സുനി, മിസ്സ്. സുജ , ഡോ. വിദ്യ അനീഷ് , മിസ്സ്. ജാസ്മിൻ , മിസ്റ്റർ. ഷമീർ , ജാവേദ് ബെയ്‌സിൽ എന്നിവർ ഈ ഹരിത സംരംഭത്തിന് നേതൃത്വം നൽകുകയും സജീവമായി പങ്കെടുക്കുകയും ചെയ്തു. നഗരമധ്യത്തിലും കൃഷിയെ നെഞ്ചിലേറ്റുന്ന പ്രവാസികളുടെ ഈ കൂട്ടായ്മ ഏറെ പ്രശംസ പിടിച്ചുപറ്റി.