News

മലയാള സിനിമയെ അന്താരാഷ്ട്ര തലത്തില്‍ ശ്രദ്ധേയമാക്കിയ സംവിധായകന്‍ അടൂര്‍ ഗോപാലകൃഷ്ണന് ഇന്ന് 81-ാം പിറന്നാള്‍. സ്വയംവരം, കൊടിയേറ്റം, മതിലുകള്‍, വിധേയന്‍, നാല് പെണ്ണുങ്ങള്‍ തുടങ്ങിയവ അടൂര്‍ സംവിധാനം ചെയ്ത ചില ചിത്രങ്ങളാണ്. അടൂരിന്റെ സ്വയംവരം എന്ന ആദ്യ ചലച്ചിത്രം മലയാളത്തിലെ നവതരംഗസിനിമയ്ക്ക് തുടക്കം കുറിച്ച രചനയാണ്.

തിരക്കഥാ രചനയിലും സംവിധാനത്തിലും ഡിപ്ലോമയുമായി 1965ല്‍ പൂനെ ഫിലിം ഇന്‍സ്റ്റിറ്റ്യൂട്ടില്‍ ചലച്ചിത്ര പഠനം പൂര്‍ത്തിയാക്കിയ അടൂര്‍ ഗോപാലകൃഷ്ണന്‍, അതേ വര്‍ഷം തന്നെ കുളത്തൂര്‍ ഭാസ്‌കരന്‍ നായരുടെ പങ്കാളിത്തത്തോടെ കേരളത്തിലെ ആദ്യത്തെ ഫിലിം സൊസൈറ്റിയായ തിരുവന്തപുരത്തെ ചിത്രലേഖ ഫിലിം സൊസൈറ്റിയും, സ്വതന്ത്രമായി സിനിമകളുടെ നിര്‍മ്മാണവും വിതരണവും പ്രദര്‍ശനവും നിര്‍വഹിക്കാനായി ചിത്രലേഖ ഫിലിം കോപ്പറേറ്റീവും സ്ഥാപിച്ചു. അരവിന്ദന്‍, പി.എ.ബക്കര്‍, കെ.ജി. ജോര്‍ജ്, പവിത്രന്‍, രവീന്ദ്രന്‍ തുടങ്ങി നിരവധി സംവിധായകരെ പ്രചോദിപ്പിക്കുവാന്‍ ചിത്രലേഖയ്ക്കു കഴിഞ്ഞു.

അടൂരിന്റെ സ്വയംവരം എന്ന ആദ്യ ചലച്ചിത്രം മലയാളത്തിലെ നവതരംഗ സിനിമയ്ക്കാണ് തുടക്കം കുറിച്ചത്. വാണിജ്യ സാധ്യതയുള്ള സിനിമകള്‍ മാത്രം പ്രേക്ഷകരുടെ മുന്നിലെത്തിയിരുന്ന കാലത്താണ് സ്വയംവരം പോലെ വേറിട്ട ഒരു സിനിമ എത്തുന്നത്. ഗാനങ്ങളും നൃത്തരംഗങ്ങളുമെല്ലാം പ്രേക്ഷകപ്രീതി നേടിയിരുന്ന കാലത്ത് സ്വയംവരം പോലെയുള്ള സിനിമയെ സ്വീകരിച്ചത് വളരെ ചെറിയ വിഭാഗം ആള്‍ക്കാര്‍ മാത്രമായിരുന്നു. പിന്നീട് ദേശീയ, അന്തര്‍ദേശീയ പുരസ്‌കാരങ്ങള്‍ വാരിക്കൂട്ടിയ സംവിധായകനായി അടൂര്‍ ഗോപാലകൃഷ്ണന്‍ മാറി. 

പത്മശ്രീ പുരസ്‌കാരം, ദാദാസാഹിബ് ഫാല്‍ക്കെ പുരസ്‌കാരം, മികച്ച സംവിധായകനുള്ള കേരള സംസ്ഥാന ചലച്ചിത്ര പുരസ്‌കാരം, മികച്ച തിരക്കഥാകൃത്തിനുള്ള ദേശീയ ചലച്ചിത്ര പുരസ്‌കാരം, മികച്ച സംവിധായകര്‍ക്കുള്ള ദേശീയ ചലച്ചിത്ര പുരസ്‌കാരം, ജെ.സി ദാനിയേല്‍ പുരസ്‌കാരം എന്നിവ അടൂരിന്  ലഭിച്ചിട്ടുണ്ട്.