News

ഇപ്പോള്‍ ഇതാ 'പവര്‍ സ്റ്റാറിന്റെ' ട്രെയ്ലര്‍ ജൂലൈ 8ന് എത്തുമെന്നാണ് ഒമര്‍ ലുലു അറിയിച്ചിരിക്കുന്നത്. ട്രെയ്ലറിന്റെ ഡബ്ബിംഗ് പൂര്‍ത്തിയായെന്നും അദ്ദേഹം സമൂഹ മാധ്യമത്തിലൂടെ അറിയിച്ചു. തൊണ്ണൂറുകളിലേതിന് സമാനമായി ആക്ഷന്‍ ഹീറോയായി ബാബു ആന്റണി തിരിച്ചുവരുന്നു എന്നത് തന്നെയാണ് ചിത്രത്തിന്റെ സവിശേഷത. ചിത്രത്തിലെ തന്റെ ലുക്ക് അടുത്തിടെ ബാബു ആന്റണി പുറത്തുവിട്ടിരുന്നു. 

നീട്ടിയ മുടി തോളിലൂടെ മുന്നിലേയ്ക്കിട്ട് താടി വളര്‍ത്തി നില്‍ക്കുന്ന ചിത്രമാണ് താരം പുറത്തുവിട്ടത്. 'നിങ്ങളില്‍ ഭൂരിഭാഗവും ആവശ്യപ്പെട്ടതുപോലെ 2022ല്‍ 90കളുടെ സ്‌റ്റൈല്‍ കൊണ്ടുവന്നിരിക്കുന്നു. പവര്‍ സ്റ്റാറില്‍ നിന്നുള്ള ഒരു സ്റ്റില്‍. നന്ദി'. ചിത്രം പങ്കുവെച്ച് കൊണ്ട് ബാബു ആന്റണി ഫേസ്ബുക്കില്‍ കുറിച്ചത് ഇങ്ങനെ.

പതിവുപോലെ കാതില്‍ കടുക്കനും കൂളിംഗ് ഗ്ലാസുമെല്ലാം ധരിച്ചാകും പവര്‍ സ്റ്റാറായി ബാബു ആന്റണി എത്തുക. 2020ന്റെ തുടക്കത്തില്‍ പ്രഖ്യാപിച്ച ചിത്രം പിന്നീട് കോവിഡ് വ്യാപനത്തെ തുടര്‍ന്ന് മാറ്റിവെയ്ക്കുകയായിരുന്നു. ലഹരി മരുന്ന് മാഫിയയ്ക്കെതിരെയുള്ള നായകന്റെ പോരാട്ട കഥ പറയുന്ന ചിത്രത്തില്‍ നായികയോ ഗാനങ്ങളോ ഇല്ലെന്നതാണ് മറ്റൊരു സവിശേഷത. 

പ്രശസ്ത തിരക്കഥാകൃത്ത് ഡെന്നിസ് ജോസഫ് തിരക്കഥ എഴുതിയ ചിത്രത്തില്‍ ബാബുരാജ്, റിയാസ് ഖാന്‍, അബു സലീം, എന്നിവരും ഹോളിവുഡ് താരം ലൂയിസ് മാന്‍ഡിലറും പ്രധാന കഥാപാത്രത്തെ അവതരിപ്പിക്കുന്നുണ്ട്. മംഗലാപുരം, കാസര്‍ഗോഡ്, കൊച്ചി എന്നിവിടങ്ങളാണ് ലൊക്കേഷനുകള്‍.