News

തെലുങ്ക് സിനിമകൾ ഇനിമുതൽ തിയേറ്ററിൽ റിലീസ് ചെയ്ത് എട്ടാഴ്ചകൾക്ക് ശേഷമേ ഒ ടി ടിയിൽ പ്രദർശനത്തിനെത്തൂ. തെലുങ്ക് ഫിലിം ചേംബർ ഓഫ് കൊമേഴ്സും ആക്ടീവ് തെലുങ്ക് ഫിലിം പ്രൊഡ്യൂസേഴ്സ് ​ഗിൽഡും ചേർന്നാണ് ഇത് സംബന്ധിച്ച തീരുമാനം കൈകൊണ്ടത്.

മൾട്ടിപ്ലെക്സുകളിലെ ടിക്കറ്റ്, ഭക്ഷണം, ശീതളപാനീയങ്ങൾ എന്നിവയുടെ നിരക്കുകളിൽ നിയന്ത്രണം കൊണ്ടുവരുന്ന കാര്യത്തിലും യോ​ഗത്തിൽ തീരുമാനമെടുത്തിട്ടുണ്ട്. ഇതുമായി ബന്ധപ്പെട്ട് മൾട്ടിപ്ലെക്സുകളുമായി ചർച്ച നടത്താനാണ് ​ഗിൽഡ് ശ്രമിക്കുന്നത്. നിരക്കുകളിൽ നിയന്ത്രണം കൊണ്ടുവരുന്നതിനുള്ള നടപടികൾ സ്വീകരിക്കണമെന്ന് എല്ലാ മൾട്ടിപ്ലെക്സുകളുടേയും മാനേജ്മെന്റിനോട് അഭ്യർത്ഥിച്ചിട്ടുണ്ടെന്നും നിർമാതാവും ആക്ടീവ് തെലുങ്ക് ഫിലിം പ്രൊഡ്യൂസേഴ്സ് ​ഗിൽഡ് പ്രസിഡന്റുമായ ദിൽ രാജു അറിയിച്ചു

താരസംഘടനയും തെലുങ്ക് ഫിലിം ചേംബർ ഓഫ് കൊമേഴ്സും നിർമാണച്ചെലവ് കുറയ്ക്കുന്നതിന് സഹകരിക്കുമെന്ന് പറഞ്ഞിട്ടുണ്ട്. കരാർ ചെയ്ത ബജറ്റിൽ സിനിമാ ചിത്രീകരണങ്ങൾ പുനരാരംഭിക്കാനും തീരുമാനിച്ചിട്ടുണ്ടെന്നും ദിൽ രാജു അറിയിച്ചു. ഒരു മാസം മുന്‍പേയാണ് ചില തെലുങ്ക് സിനിമകളുടെ ചിത്രീകരണം സാമ്പത്തിക പ്രസിസന്ധിയെ തുടര്‍ന്ന് നിര്‍ത്തി വച്ചത്. നേരത്തെ സമാനമായി ബോളിവുഡും ഒടിടി വിന്‍ഡോ സമയം നീട്ടിയിരുന്നു.