News

കമല്‍ ഹാസന്റെ കരിയറിലെ ഏറ്റവും വലിയ ചിത്രങ്ങളിലൊന്നായ ഇന്ത്യന്‍ 2 അണിയറയില്‍ ഒരുങ്ങുകയാണ്. ഉലക നായകന്റെ ചിത്രത്തിനായി ആരാധകര്‍ ആവേശത്തോടെ കാത്തിരിക്കുകയാണ്. ഇപ്പോള്‍ ഇതാ കമല്‍ ഹാസന്‍ ഇന്ത്യന്‍ 2ന് ഒപ്പം ചേര്‍ന്നു എന്ന വിവരമാണ് പുറത്തുവരുന്നത്. 

സെപ്തംബര്‍ 22 വ്യാഴാഴ്ചയാണ് ചിത്രത്തിന്റെ ഷൂട്ടില്‍ കമല്‍ ഹാസന്‍ ജോയിന്‍ ചെയ്തത്. ലൊക്കേഷനില്‍ നിന്നുള്ള പുതിയ ചിത്രങ്ങള്‍ അദ്ദേഹം സമൂഹ മാദ്ധ്യമങ്ങളിലൂടെ പങ്കിട്ടുണ്ട്. എസ്. ശങ്കര്‍ സംവിധാനം ചെയ്യുന്ന ഒരു ആക്ഷന്‍ ത്രില്ലറാണ് ഇന്ത്യന്‍ 2.

ഷൂട്ടിംഗ് സെറ്റില്‍ സംവിധായകന്‍ ശങ്കറിനൊപ്പമുള്ള ചിത്രങ്ങളാണ് കമല്‍ ഹാസന്‍ പങ്കുവെച്ചിരിക്കുന്നത്. ചിത്രങ്ങളില്‍ ഇരുവരും തമ്മില്‍ കാര്യമായ രീതിയില്‍ സംഭാഷണം നടത്തുന്നത് കാണാം. വിക്രം എന്ന ചിത്രത്തിന്റെ വലിയ വിജയത്തിന് ശേഷം കമല്‍ ഹാസന്റേതായി പുറത്തിറങ്ങാനിരിക്കുന്ന ചിത്രമാണ് ഇന്ത്യന്‍ 2.

1996ല്‍ പുറത്തിങ്ങിയ ചിത്രത്തിന്റെ തുടര്‍ച്ചയായ ഇന്ത്യന്‍ 2ല്‍  അഴിമതിക്കെതിരെ യുദ്ധം ചെയ്യാന്‍ തീരുമാനിക്കുന്ന പ്രായമായ ഒരു സ്വാതന്ത്ര്യ സമര സേനാനിയുടെ വേഷത്തിലാണ് കമല്‍ ഹാസന്‍ എത്തുന്നത്. ആദ്യഭാഗം പോലെ തന്നെ ശക്തമായ ഒരു സന്ദേശം ഈ ചിത്രത്തിലുണ്ടാകാനാണ് സാധ്യത. ഇന്ത്യന്‍ 2ല്‍ കാജല്‍ അഗര്‍വാളാണ് നായിക. ഇരുവരും ആദ്യമായി ഒന്നിക്കുന്ന ചിത്രം കൂടിയാണിത്. 

രാകുല്‍ പ്രീത് സിംഗ്, പ്രിയ ഭവാനി ശങ്കര്‍, സിദ്ധാര്‍ത്ഥ് എന്നിവരാണ് ചിത്രത്തിലെ അഭിനേതാക്കള്‍. ഇന്ത്യന്‍ 2ന് മൂന്ന് മണിക്കൂറും 10 മിനിറ്റും ദൈര്‍ഘ്യം ഉണ്ടാകുമെന്ന് പ്രതീക്ഷിക്കുന്നതായി എഴുത്തുകാരന്‍ ബി ജയമോഹന്‍ അടുത്തിടെ പറഞ്ഞിരുന്നു. വിചാരിച്ച പോലെ കാര്യങ്ങള്‍ നടന്നാല്‍ ശങ്കറിന്റെ കരിയറിലെ ഏറ്റവും ദൈര്‍ഘ്യമേറിയ ചിത്രമായിരിക്കും ഇത്. 

വിക്രമിന് വേണ്ടി മുമ്പ് കമല്‍ഹാസനുമായി സഹകരിച്ച അനിരുദ്ധ് രവിചന്ദറാണ് ഇന്ത്യന്‍ 2ന്റെ സംഗീതം ഒരുക്കിയിരിക്കുന്നത്. സുബാസ്‌കരന്‍ അല്ലിരാജയും ഉദയനിധി സ്റ്റാലിനും ചേര്‍ന്നാണ് ഇന്ത്യന്‍ 2 നിര്‍മ്മിക്കുന്നത്.