കടുവ യിലെ വിവാദ ഡയലോഗ് മാറ്റുമെന്ന് അണിയറ പ്രവര്ത്തകര്
|
|
Written By
|
News
ഷാജി കൈലാസ്-പൃഥ്വിരാജ് ചിത്രം 'കടുവ'യിലെ ഭിന്നശേഷിക്കാര്ക്കെതിരെയുള്ള ഡയലോഗില് മാറ്റം വരുത്തുമെന്ന് അണിയറ പ്രവര്ത്തകര്. സീന് കട്ട് ചെയ്യാതെ ഡയലോഗ് മാത്രം മാറ്റം വരുത്താനുള്ള ശ്രമം ആരംഭിച്ചതായാണ് അറിയിച്ചിരിക്കുന്നത്. സിനിമയിലെ രംങ്ങള് നീക്കം ചെയ്യണമെന്നാവശ്യപ്പെട്ട് സാമൂഹിക മാധ്യമങ്ങളില് അടക്കം നിരവധി പേര് രംഗത്തെത്തിയതിന് പിന്നാലെയാണ് ഡയലോഗില് മാറ്റം വരുത്താനുള്ള തീരുമാനം. സിനിമയുടെ പല ഭാഗങ്ങളിലും സെന്സര് ബോര്ഡ് ഇടപെട്ടെങ്കിലും ഈ സംഭാഷണത്തില് സെന്സര് ബോര്ഡ് ഇടപെട്ടിരുന്നില്ലെന്നും അതുകൊണ്ടാണ് ഈ ഡയലോഗോടുകൂടി സിനിമ പുറത്തിറക്കിയതെന്നുമാണ് അണിയറപ്രവര്ത്തകരുടെ വിശദീകരണം.
ഭിന്നശേഷിക്കാരെ അവഹേളിച്ചെന്ന പരാതിയില് സംവിധായകന്, നിര്മാതാക്കളായ സുപ്രിയ മേനോന്, ലിസ്റ്റിന് സ്റ്റീഫന് എന്നിവര്ക്ക് നോട്ടീസ് അയയ്ക്കാന് സംസ്ഥാന ഭിന്നശേഷി കമ്മിഷണര് എസ്.എച്ച്. പഞ്ചാപകേശന് ഉത്തരവിട്ടിരുന്നു. ഭിന്നശേഷികുട്ടികള് ജനിക്കുന്നത് അവരുടെ മാതാപിതാക്കള് ചെയ്ത പാപത്തിന്റെ ഫലമാണ് എന്ന അര്ഥത്തില് നായകന്റെ സംഭാഷണം ഉള്പ്പെടുത്തിയിരിക്കുന്നത് 2016-ലെ ഭിന്നശേഷി അവകാശനിയമം 92-വകുപ്പ് പ്രകാരമുള്ള കുറ്റകൃത്യമാണെന്ന് ചൂണ്ടിക്കാട്ടി പരിവാര് കേരള എന്ന ഭിന്നശേഷി സംഘടന ജനറല് സെക്രട്ടറി ആര്. വിശ്വനാഥനാണ് പരാതി നല്കിയത്.
വിവാദ പരാമര്ശത്തില് ക്ഷമാപണം നടത്തി ഷാജി കൈലാസും പൃഥ്വിരാജും രംഗത്തെത്തിയിരുന്നു. ക്ഷമ പറഞ്ഞതുകൊണ്ട് മാത്രം വിഷയം അവസാനിക്കുന്നില്ലെന്നും പ്രസ്തുത ഭാഗം സിനിമയില് നിന്നും നീക്കം ചെയ്യണമെന്നമാണ് സോസ്യല് മീഡിയയില് നിന്നുയരുന്ന ആവശ്യം. സിനിമയില് ശാരീരിക വെല്ലുവിളി നേരിടുന്ന ബാലകഥാപാത്രത്തേക്കുറിച്ച് നായക കഥാപാത്രം നടത്തുന്ന വിവാദ ഡയലോഗ് കൈപ്പിഴയാണെന്നായിരുന്നു സംവിധായകന് ഷാജി കൈലാസ് പ്രതികരിച്ചത്. അങ്ങനെയൊരു സംഭാഷണം എഴുതുമ്പോള് തിരക്കഥാകൃത്ത് ജിനുവോ അത് പറയുമ്പോള് നായകനായ പൃഥ്വിരാജോ ആ സീന് ഒരുക്കുമ്പോള് ഞാനോ അതിന്റെ മറ്റ് വശങ്ങളെക്കുറിച്ച് ചിന്തിച്ചില്ല എന്നതാണ് സത്യമെന്നും സംവിധായകന് വ്യക്തമാക്കിയിരുന്നു. ക്ഷണിക്കണം, തെറ്റാണെന്ന് അംഗീകരിക്കുന്നുവെന്ന് പൃഥ്വിരാജും പറഞ്ഞിരുന്നു.
സിംഹാസനം എന്ന ചിത്രത്തിന് ശേഷം പൃഥ്വിരാജ്-ഷാജി കൈലാസ് ടീം ഒന്നിക്കുന്ന ചിത്രമാണ് കടുവ. ജിനു വി എബ്രഹാമിന്റേതാണ് തിരക്കഥ. ലൂസിഫറിന് ശേഷം വിവേക് ഒബ്രോയ് മലയാളത്തില് അഭിനയിക്കുന്ന ചിത്രം കൂടിയാണ് കടുവ. അര്ജുന് അശോകന്, അലന്സിയര്, ബൈജു, രഞ്ജി പണിക്കര് തുടങ്ങിയവരാണ് മറ്റുപ്രധാനവേഷങ്ങളിലെത്തുന്നത്.
അഭിനന്ദ് രാമാനുജം ഛായാഗ്രഹണവും ജേക്സ് ബിജോയ് സംഗീത സംവിധാനവും നിര്വഹിച്ചിരിക്കുന്നു. കനല് കണ്ണന്, മാഫിയാ ശശി എന്നിവരാണ് സംഘട്ടന സംവിധാനം. എഡിറ്റിങ് ഷമീര് മുഹമ്മദ്. പൃഥ്വിരാജ് പ്രൊഡക്ഷന്സ്, മാജിക് ഫ്രെയിംസ് എന്നിവര് ചേര്ന്നാണ് ചിത്രം നിര്മിച്ചിരിക്കുന്നത്.
Related Stories
See All
Latest Update
